Gaztainak eta Albariño ardoa Magosto Egunean

elgoibarren.net 2006ko aza. 11a, 12:06

Galiza Kultur Etxeak antolatuta, 400 kilo gaztaina erre eta 300 litro ardo banatuko dituzte gaur, Magosto Egunean. Xirimiriarekin esnatu da goiza, baina herritar mordoa inguratu da Galiza Etxekoek Nafarroa plazan jarri duten txosnara. 12:00etatik 15:00etara bitartean gaztainak doan dastatzeko aukera izango da.

Berotan sartzeko produktu onak Galizia aldeko gaztainak eta ardoa.

Duela 20 urte hasitako ohiturari jarraituz, herritarren aurrean erre dituzte gaztainak Galiza Kultur Etxeko bazkideek. Behin sua ondo eginez gero, gaztainak erretzeko 20 minutu nahikoa direla azaldu digute. "Galizian dudan etxetik ekarriak dira hauek", azaldu digu danbolinaren arduradunak, "kalitate oneko gaztainak dira, gainera. Begira bestela nola askatzen zaien azala".

2003an jaitsi zuten estrainekoz Magosto Eguna kalera. Aurrez, Galiza Etxean bertan egiten zuten, "elkarteko bazkideak, auzotarrak eta herriko lagun gutxi batzuk gerturatzen zirela ikusirik, ohitua hau kalera jaistea erabaki genuen. Eta hartutako erabakarekin bete-betean asmatu genuela uste dut" azaltzen du Gumersindo Vila, Galiza Kultur Etxeko presidenteak.

Gumersindo Vilari elkarrizketa (BARREN pdf -2006-11-10-)

• Gaztainak erretzeko prozesua iruditan

Gizartea Elgoibar